فرجان
FIRJAN
آخر تحديث: 5 أغسطس 2026 · 14 بند
فرجان تطبيق مجهول — ما نطلب اسم ولا رقم ولا إيميل عشان تستخدمه. نجمع: معرّف جهاز عشوائي (يتولد على جهازك)، نصوص منشوراتك وردودك وتصويتاتك، موقع تقريبي (نضبّبه ±200 متر قبل ما ينحفظ)، واسم مدينتك. لو رفعت صورة، تنحفظ الصورة نفسها. ونسجّل بعد أي منشور تفتحه أو تصوّره (لقطة شاشة) مربوط بمعرّف جهازك — عشان نحسب عدّاد المشاهدات واللقطات اللي يبان على المنشور، ويوصل صاحب المنشور تنبيه «أحد صوّر منشورك» بدون ما نكشف له مين أنت. هذي السجلات تنمسح مع باقي بياناتك لو حذفت حسابك.
عشان يشتغل التطبيق: نعرض منشورات فريجك القريبة، نحسب التصويتات، ونحمي المجتمع من الإساءة (فلترة كلمات، مراجعة بلاغات، حظر أجهزة مسيئة).
بياناتك على خوادم Supabase في مومباي، الهند. تنبيه مهم: الصور المرفوعة تنحفظ في مخزن عام — أي شخص معه الرابط يقدر يشوفها. لا ترفع صور فيها معلومات شخصية.
المحتوى يبقى لين تحذفه أنت أو تحذف حسابك. لما تحذف حسابك ينطفي على طول، وتبقى بياناتك محفوظة ٣٠ يوم عشان تقدر ترجّعه، وبعدها تنمسح نهائياً. ولما ينخفي منشور بالإشراف أو تحذفه أنت، نحفظ نسخة منه للمراجعة والاستئناف وتنمسح مع المنشور. الاستثناء الوحيد: المحتوى اللي انبلّغ عنه أو شاله الإشراف، ومعه سجلات البلاغات والحظر — هذي نحتفظ فيها ١٢ شهر حتى لو حذفت حسابك، لحماية المجتمع وللرد على الطلبات الرسمية، وبعد الـ١٢ شهر تنمسح هي بعد.
من حسابي ← «احذف حسابي» تقدر تحذف حسابك بأي وقت، بدون ما تسألنا. الحذف يطفّي حسابك على طول: منشوراتك وردودك تختفي عن الكل وما تظهر لأحد في الفريج. بعدها لك ٣٠ يوم ترجّع فيها كل شي بضغطة من نفس الجهاز — أو بكود الاسترجاع اللي نعطيك إياه وقت الحذف لو بترجع من جهاز ثاني، فاحفظ الكود لأنه بدونه ما يرجع الحساب من جهاز ثاني. وبعد الثلاثين يوم ينمسح كل شي نهائياً: منشوراتك وردودك وتصويتاتك وصورك ورسائلك الخاصة وتسجيلات وصولك ورصيدك الذهبي وسجل ألعابك — عدا المحتوى المُبلّغ عنه وسجلات الإشراف المذكورة فوق.
رسائلك الخاصة خاصة — ما نتصفّحها. الاستثناء الوحيد: لو انبلّغ عن محادثة، يقدر الإشراف يطّلع عليها للتحقق من الإساءة وحماية الطرف الثاني، وكل اطّلاع يتسجّل عندنا. ما نستخدم محتوى رسائلك لأي غرض ثاني.
رسايلك في الغرف الجماعية يشوفها باقي أعضاء الغرفة — الغرف العامة مفتوحة لكل مستخدم، والغرف الخاصة بكود تشاركه أنت. تقدر تضغط مطوّل على أي رسالة عشان تبلّغ عنها أو تحظر صاحبها، والرسالة المُبلّغ عنها تنخفي عنك على طول وتنخفي عن الكل لو تعددت البلاغات. ورسايلك في الغرف تنمسح مع باقي بياناتك بعد ٣٠ يوم من حذف حسابك.
ما نبيع ولا نشارك بياناتك مع معلنين. الإعلانات داخل التطبيق تظهر للجميع بدون استهداف شخصي.
باستخدامك فرجان، توافق إننا نعالج البيانات المذكورة فوق ونخزّنها على خوادم آمنة في الهند — أي خارج قطر — بالقدر اللي يسمح به القانون. هذي خطوة ضرورية عشان التطبيق يشتغل، ونحرص على حماية بياناتك وقت النقل والتخزين. لو ما توافق على هذا، لا تستخدم فرجان.
نحمي بياناتك بإجراءات معقولة، بس ما فيه نظام على وجه الأرض آمن 100%. لأقصى حد يسمح به القانون، ما نتحمّل مسؤولية أي اختراق أو تسريب خارج عن سيطرتنا وما هو بسبب تقصير منّا. ولأن فرجان تطبيق مجهول بدون حسابات، وما عندنا إيميل لأغلب المستخدمين، ما نقدر نبلّغك بشكل شخصي؛ لكن لو صار خلل أمني كبير بنحاول ننشر تنبيه داخل التطبيق قدر المستطاع.
عشان التطبيق يشتغل نستعين بخدمات خارجية: Supabase تخزّن بياناتك في الهند وتشتغل حسب تعليماتنا فقط. وآبل وقوقل (المتاجر والدفع) ومزوّد الإشعارات ومزوّد إدارة الاشتراكات RevenueCat يتعاملون مع جزء من بياناتك حسب سياسات الخصوصية الخاصة فيهم هم — لهم شروطهم المستقلة وما نتحكم في طريقة تعاملهم مع بياناتك، وننصحك تطّلع على سياسة خصوصية كل واحد منهم. ملاحظة عن المشتريات: RevenueCat ما يستلم معرّفك السري أبداً — يستلم بصمة أحادية الاتجاه منه (SHA-256) عشان يعرف الشراء لأي حساب بدون ما يقدر يدخل عليه. أما نحن، من طرفنا، ما نبيع بياناتك ولا نستهدفك بإعلانات.
صحيح إننا ما نبيع ولا نشارك بياناتك مع المعلنين، لكن في حدود ما يسمح به أو يفرضه القانون: لو طلبت جهة رسمية أو قضائية مختصة بشكل نظامي، أو كان عندنا اعتقاد بحسن نية إن فيه خطر على أحد أو مخالفة للقانون، يحق لنا نكشف للجهات المختصة عن المعرّف والمحتوى والموقع التقريبي المرتبط فيه — بأقل قدر لازم. المجهولية داخل التطبيق ما تحميك من القانون القطري.
في «تواصل معنا» تقدر — اختيارياً — تعطينا إيميل أو رقم عشان نرد عليك؛ ينحفظ مربوط بجهازك مع رسالتك، وينمسح مع باقي بياناتك حسب المدد المذكورة في «كم نحتفظ فيها» فوق. وفي «أعلن معنا» نطلب اسم نشاطك ووسيلة تواصلك عشان نرد على طلب الإعلان — هذي بيانات نشاط تجاري مو مربوطة بجهازك، فما تنمسح مع حذف حسابك؛ بس اسمك ووسيلة تواصلك ينمسحون تلقائياً خلال ١٢ شهر من انتهاء حملتك (نبقّي أرقام الحملة بدون بياناتك الشخصية)، ولو تبيهم ينمسحون قبل راسلنا على team@firjan.app. وما نستخدم أي وحدة منهم لغرض ثاني ولا نعطيها لأحد.
أي سؤال عن خصوصيتك: team@firjan.app